سؤال / ناصر الثعالبي

سؤال / ناصر الثعالبي                                                     

سولف لي ..

شلون الناس تكبر

والزمان ايشيخ!!

سولف لي

على غيمه زغيره

اتبوك صحوة صيف !!

على الدنيا الترادت

بالصحو والطيف

سولف لي

على خشرم زلم

من كيفت بالكيف

نسيانين عزتك يانفل ياحيف !

يا دم اليعارك سيف

ياركبة اكحيله التعبت خيال

جفك ما لواه الجوع

ولا ضحكت اسنونك من تلاكي ارغيف

ولو طشت الغربه اعضاك

وانت اتصيح

يعضاي التمو هذا آنه

مجروح ايضمد بردانه

وتغيب الناس..

سولف لي

(شسولف لك

ونه الماضاك عمري اوياك سالوفه)

وشك ازياك روحي ابمحنتك

بسكوت

وخاف اتشوفني روحي

جفن للموت