حكومات / كامل الركابي
الخارجية
الوطن
طن من اللغو
والسفسطات !
الداخلية
الوطن شرطة
وكاتمات!
الكهرباء
الوطن
ضي خافت
فوانيس
وشموع!
الصحة
ع الصحة
بحزن
تذرف دموع!
الثقافه
كلمه يسمعها
الوزير
وبيده يتحسس
مسدس ! *
الدفاع
جندي
بارض المعركة
بدشداشه
ضاع !
الصناعة
والمعادن
والنفط
هي تحظى
بأولوية
بأرقى برنامج
شفط !
العدل
قاضي مخضرم
بالتعاقب
للأمان
هو نفسه
بكل زمان !
المال
مال الناس
بس الهم طبع
متقشفين !
الوزارات الزغيره
للأمير
وللأميره
وإذا تكبر
للعشيرة!
مبروك
حج قريبي
البارحه
مبروك حجّي
صرت تلعب
بالذهب
أصلك
تبيع الناس :رجّي !
حج نسيبي
البارحة
مبروك حاج
چانت سنونك
تنك
واليوم عاج !
والحفيد
الراح للحج
ابمشقه
وهو بعده
ْبطن امه
ولد حجّي
وخره بصرمه!
حج منافق
رجع وي بنت
بعمر بنته
وتبسّم
مرته گالت : بركاتك
گلها: طالق!
حج مدير
رجع
من الحج وزير!
حج ابو السبحه
الطويله
وكتل حاله
بالتسابيح بيمينه
والتراويح
ابشماله
جان يتوقع
گبل يوم اغتياله !
حج صديق
من السويد
وبنبع زمزم غرگ
جان من يحلف صدگ
يرفع الكاس
ويصيح:
اي وحگ رب العرگ!
عيد المبارك عليك
مذبح الخرفان
والإنسان
هذا الدم
كل الدم
بديك !