ساحة الحبوبي / كامل الركابي
ضم چفك
ابچفي الندي
وخلينه
نرگص چوبي
مو بس عرس
هذا الجمال
بساحة الحبوبي
مرت النسمه
اتلفتت
ماشافتك
ضمت خجلها
بثوبي
گلتلها :
راح
من الفجر
مدري اشسمع
عن ساحة الحبوبي
والنسمه ظلت تنتظر
بزلوفها
اينام العطر
يمته يجي
ايجيب الخبر
عن ساحة الحبوبي
مرت الليلة
ومانمت
مدري ابحلم
مدري ابصحو
مدري اشفت
دم وصحت : محبوبي
سال وترس
كل ساحة الحبوبي !
ومن الصبح
والشمعة نادت شمعه
ومن حومرت
نادت العين الدمعه
ردي
الحبيب اليرتجي
ويگول فدوه
العينچ الحلوة : امسحي ذنوبي
وحطيلي صوره
ابساحة الحبوبي!