خيه جرشي... / حسن حاتم المذكور
صبرچ اللامه الصبر
عبيه وجرشي
ونتي من سبوس الضيم
هاچ اخذي وطحني
وانه حال الكدر حالي
تايهه بديرة هلي
والوطن ملچوم
شايلته على چتفي
خلي ضيمي وضيم كل الناس
وي همچ وجرشي
..........
لا هي سنين الگحط
والجوعنه عدنه عذرنه
حتى لو طاعون
عطابة صبر تشفي جرحنه
وبينه لو مال الوكت
يحمينه ويلمنه سلفنه
مصابنه ما ينوصف
ما صار گبله
الصار بينه
عگب المنازل والزرع
وبيوت اهلنه
صبحت هيمه
ووطن ملچوم
شايلته على چتفي
خلي ضيمي وضيم كل الناس
وي همچ وجرشي
...........
خيه مچلوبين اجونه
بليله ظلمه ضباع چنهم
يكرم العضاض من طبع العليهم
لا حيه ولا ذمه عدهم
حتى الشوارع
لطخوهه بدم ولدنه
دهر فرهم
يرطنون بالمعروف
ما نعرف دردهم
وشاغ طفوا مهجته
تاريخ كتلوا
ظل جرحهم
يوجع الديره جرحهم
وانه حال الضيم حالي
تايهه بديرة هلي
والوطن ملچوم
شايلته على چتفي
خلي ضيمي وضيم كل الناس
وي همچ وجرشي
..............
البين صاب اهلك وصابك
يا زمان البيك اجوا
عاب حملك
من هذاك الصوب
بيك تلملموا
عسكروا بالسلف هندس
والصبح بالعين طفوا
العيد بهلاله نذبح
الفرح والضحكات كتلوا
دولاب مروا
لا اثر للناس لا للديره خلوا
بس وطن مجروح
شايلته على چتفي
خلي ضيمي وضيم كل الناس
وي همچ وجرشي
....
مثل واوي الزور ذوله
خيه حيالين واكثر
ولچ مثل الذيب
غدارين واكثر
وذاك ابو عمامه اليصلي
وبسنه ايده
چان (هتلي) وما يشور
ذوله شيعي يبوك شيعي
ذوله شيعي يخون شيعي
يبيع شيعي "الله واكبر"
مذهب "اهل البيت هذا"
لو صخام الوجه ياختي؟؟؟
خلي ضيمي وضيم كل الناس
وي همچ وجرشي
ونتي من سفير البين
هاچ اخذي وطحني
وانه حال الكدر حالي
تايهه بديرة هلي
والوطن ملچوم
شايلته على چتفي
..............
مشوا زيتوني
وجوا لحيه ومحابس
تفصل المعروف والمنكر
على شخير المجالس
طلع علاس اليشور
خيه بعرينه الچفن لابس
ولچ لا بس موتنه
شفتي شعواط الچذب
والغيره نزعت ثوبهه
والوجه يابس
باگوا المامش من عيون اليتامه
والباگنه للدين حارس
خيه شدن حيلچن
صيحن الصوب الجنوب
منك انريد الفرج
وسنينه البيهه فرحنه
نگول ردن
علگن چراغدچن بيارغ
فوگ هامات النخل
تموز للساحه وصل
... خيه وصل
والوطن فزّ على چتفي
ولچ دگي وهلهلي
وانتي اطحني
ارغيف اهلنه
خيه الوطن جوعان اخبزي
خيه الشعب جوعان اخبزي
خيه اخبزي وهلهلي
علگن جراغدچن
على چتاف النخل
تموز للساحه وصل
...... خيه وصل
ـــــــــــــــ