طَبْع
انت تتجنب
تشوف
من الحقيقه
المُر
تحِّب اتشوف
گشرتها
الرقيقه
وطعمها الحلو
وطلّتها الأنيقه!
تفاطين
ذكرياتك بالخَزِن
ماضايعه
مطبوعه
ع اللوح الرمادي
وبالتلاوين
بس انت العمر
خلاّك
تتذكر
تفاطين!
العسل
النحله العامله
وهيّ بوسط ورده
وتخاف
من مزاج الملكه
طول دورات الفصول
نايمه
بعالي الضفاف
وتشتهي من العسل
زهر السدر
والليمون
والصفصاف!
الصديق
مدري شنهي
براسي داير
سَوْرَه
من ريح وحريق
الجار المخبّل
ضحك
من شافني احچي
ويَّ روحي
بالطريق
همس باذني
كلمتين وكلمتين
وهو ماشي
گال : صرنه اثنين
واعتبرك صديق!