صباح الخير...كردستان
صباح الخير
وتغنّي الطيور..ألوان
صباح الخير
للخُضره
بگلي الرمان
صباح الخير
لاحلامك رعد
بعيون بشت آشان
ظلّت ع الصخر
مرسومه بالدم
وطن , نخله , طفل فرحان
يابصره
رعدنه ابمطر يضويها
المراجل دم
لوغطّت سماها احزان
خزن گلبه هموم الناس
شعلها وشبّت ابدخان
نار اتوّجرت بالضيم
من كثر السهر والغربه
والحرمان
صباح الخير يحبيِّب
والف بوسه
للذكرى التمر
ابسيدي بلعباس
وتغني ابدربها ايام وهران !
صباح الخير ...كردستان
صباح الخير
للنسمه
بعذوبه اتهِّب
للحنطه
بضوه النجمات تتذهب
للگرصه
بشمس تنور تتجسب
صباح الخير
ياأول رصاصه
بكل غنجها اتشِّب !
صباح الخير ...كردستان
صباح الخير ياﮔﺎره
صباح الخير ياقنديل
صباح الخير يا احلام
ضوَّت بالرصاص الليل
نجوم اتفك حزنها ابصوت
أصهل من صهيل الخيل
صباح الخير
ياأطيب ﮔلب
خضًّرعليك
الجوري والرمان
وتندّه ابّخور وهيل
صباح الخير...كردستان
صباح الخير
لليحلم ابنار
وع الثلوج ايفوت
لضلوع إنحنت ع الصخر
تنحت بالصخور ابيوت
تضويها الفوانيس
وتنام امشابگ وي الموت !
صباح الخير...كردستان
صباح الخير
للگاع ابوداع إنجومها
ال بالملگه حلمانه
صباح الخير
يانجمة صبح
يانجمة الثوار
يعين ..إشتاگت الها
اعيون سهرانه
صباح الخير ياوضاح
يالهفة فرات
السدره عطشانه
صباح الخير...كردستان
صباح الخير يابو حسين صباحك ياعلي ابراهيم
يافرحة عرس
ياغنوة ازغار
ياغيرة مهر
يالمَّة ازهار
صباحك
هاكثر ضمّيت
بگليبك شمس وانهار
صباحك
هاكثر ضوَّيت
بچفوفك غضب ثوار
صباحك
ياحزن امي عليك
المالگت مثلك
لابنها احبيِّب اليوفي
وصديق اليستحي ويغار !
صباح الخير ...كردستان
صباح الخير
لرغيف الخبز ..حار
للچاي الحلو
اليخدر بالاسرار
للدار التضيِّفنه العشاها
وناس ذيج الدار
لشكفته* تدَّفت
من جمر بلوط
مو من حطب تين
الماله جمرة نار
لليمشي ابمسافات
ولهب گلبه الحزن ثار
لليعطش
يشوف الماي من ابعيد
يضوي ابشجرة اسبندار
صباح الخير
يحبيّبه والف بوسه
للنيِّه التحط خطوتها
وي خطوات الانصار !