بقلم الرفيق الشهيد عبد المطلب كمال العزاوي (ابو سعيد)* بمناسبة عيد الحزب 31 اذار 1984..
سفينتنه الحزب .. والعمال سفانه .. من يوم ابحرت دنيتنا فرحانه
من ريف العماره، للكوي، لديانه .. من بصرتنه.. من اربيل.. من بغداد .. من عانه
سواعدنه تصير شراع، فن روج اليلاويها .. وكَلوب الشغيلة اشموس، كل الدنيه تضويها
ما يغمض جفن سفان، لو غيمه تمر بيها .. اشحده البحر يكَدر، سفينة حزبي ياذيها
احنه إلها زلم، شدات ياحزبي .. ما ذلّن بيارغنه، ولا مره رجف كَلبي
ياحزبي لاجل عيناك، كل مساهري وتعبي .. من يوم العرفتك ياحزب، واضح صبح دربي
وبعيدك يحزبي، اشعل شموعي .. واغنيلك، واحس من فرحتي دموعي
واروح لك، وسوي جسور بضلوعي .. واكلك، هويتي كادح شيوعي .. واكولن ياشعب، شوف الاغاني وشوف نوعي
لاحلف بدم ستار، واحلف بجوعي .. مثل المطر للكاع، دم الشيوعي
لو كطعوا الجفين، ازرع ضلوعي .. يصيرن درج للناس، ضلوع الشيوعي
هله بهودج حزبنه بليلة الفرحه .. هله بحزب الشهاده اللي زهر جرحه
وبليل الشدايد نجمه تلالي وفجر صبحه
يظل عالي الحزب بيكم .. تحرسه زنود عماله وكدح فلحه
...........
* الرفيق الشهيد أبو سعيد من مواليد 1954 بغداد / الثورة. خريج جامعة السليمانية كلية العلوم قسم الفيزياء. التحق بالحركة الانصارية قادما من الجزائر عام 1981، واستشهد في معركة (ايلنجاغ) مع قوات الاتحاد الوطني الكردستاني في 5 حزيران 1985.